मेलम्चीमा भेटिएको पहेंलो धातु परीक्षणका लागि खानी विभागमा

0 34

१८ मङ्सिर, मेलम्ची । बहुप्रतिक्षित मेलम्ची खानेपानी आयोजनाको मुख्य सुरुङमार्ग रहेको अम्बाथानमा ड्यामको ढिस्को खन्ने क्रममा भेटिएकोे पहेलो पदार्थलार्इ परीक्षणका लागि काठमाडाैं ल्याइएकाे छ ।

प्रारम्भिक परीक्षणबाट भेटिएको धातु परीक्षणका लागि मेलम्ची खानेपानी आयोजनाका कर्मचारीले काठमाडौँ पठाएको सुरक्षा निकायले जानकारी दिएको छ ।

 नेपाली सेना मेलम्चीका प्रमुख सेनानी विक्रम राणाले ड्याम मर्मत गर्ने ढिस्को कटिङ गर्दा सुनजस्तो देखिने धातु फेला परेको र परीक्षणका लागि आज खानी तथा भूगर्भ विभागमा पठाइएको जानकारी दिए।

melamchi-pahelo-sun

सुन जस्तो अनौठो धातु फेला परेपछि ड्याम निर्माणका लागि ढिस्को कटिङ गर्ने कार्य रोकिएको छ । फेला परेको धातुको नमुना सङ्कलन गरी स्थानीय, प्रहरी, सेनाको उपस्थितिमा स्थानको मुचुल्कासहित राजधानीमा खानी तथा भूगर्भ विभागमा प्राविधिक जाँच गर्न पठाइएको छ ।

ड्याम मर्मत केन्द्रमा सुनजस्तै देखिने धातु भेटिएपछि काम भइरहेको ठाउँमा काम रोकेर हेर्नेको भीड लागेको थियो ।

हेलम्बु गाविसका सचिव नारायण पौडेलले काम गरिरहेको ठाउँमा सुन जस्तै धातु भेटिएको प्रमुख जिल्ला अधिकारी अन्तरबहादुर सिलवाललाई जानकारी गराएको पौडेलले बताए ।

केही समयको हल्लापछि त्यस ठाउँलाई सेनाले आफ्नो नियन्त्रणमा लिएको थियो । अहिले सेना र प्रहरीले त्यस क्षेत्रलाई घेराबन्दी गरी पहरा दिइरहेको छ ।