मिसकलले जुराएको दृष्टिविहीनको जोडी

0 13

मोबाइलमा बारम्बार आएको मिस्कलबाट सम्पर्क भई प्रेम भएर बैवाहिक बन्धनमा बाँधिएका उर्लाबारी १ विशाल टोलका नेत्रहीन दम्पत्ती ३१ वर्षीय होमबहादुर बयलकोटी र इलाम नयाँ बजारकी २४ वर्षीया सम्झना लिम्बू गफ गर्दै । तस्बिरः गोपालप्रसाद पोखरेल, रासस

(गोपाल प्रसाद पोखरेल)

पथरी (मोरङ), २५ कात्तिक । नम्बर गल्ती भएर गरेको फोनकलबाट पनि कतिपय प्रेममा परेर वैवाहिक सम्बन्धमा बाँधिएका घटना समाजमा धेरै सुन्न पाइन्छ ।

कोही फोनमा बोलेर प्रेम गर्ने र मक्ख हुने तर पछि बास्तविक भेट हुँदा भने पन्छिएर प्रेम सम्बन्ध नै भुल्ने गरेका कुराहरु पनि बेलाबखत चर्चा हुन्छ । तर संयोग नै मान्नुपर्छ, अपरिचित नम्बरबाट आएको फोनकलबाट प्रेम भई एक नेत्रहीन जोडी वैवाहिक सम्बन्धमा बाँधिएका छन् ।

प्रसङ्ग हो, उर्लाबारी–१ विशालटोलका नेत्रहीन दम्पती ३१ वर्षीय होमबहादुर बयलकोटी र इलाम नयाँबजारकी २४ वर्षीया सम्झना लिम्बूबीचको ।

झट्ट सुन्दा फिल्मको कथाजस्तो लागेपनि वास्तविक जीवनको कुरा हो यो । अनजानमै सम्झना लिम्बूको मोबाइल नम्बरमा मिस्कल हान्नुभएका बयलकोटीले केटीको मधुर आवाज सुन्न थालेपछि होमले मन थाम्न नसकेपछि निरन्तर ‘मिस कल’ गरिरहनुभयो ।

एक दिन मोबाइलको घण्टी बज्यो । होमले हत्तपत्त फोन उठाउनुभयो, तर फोन काटियो । सोही नम्बरमा फेरि फोन दबाउनुभयो । पहिलोपटकमा फोन उठेन, अर्काेपटक पुनः फोन गर्दा तीनै केटीको आवाज सुनियो । यी दुईबीच फोनमा बाक्लै कुराकानी चल्न थाल्यो । आफूले माया गर्ने र बिहे नै गर्ने कुरा होमबाट आएपछि सम्झना भावुक हुँदै आफू नेत्रहीन भएको बताउनुभयो ।

सम्झनाले आफू नेत्रहीन भएको बताएपछि होमले आफू पनि नेत्रहीन भएको बताउनुभयो । त्यसपछि होम र सम्झनाको प्रेम प्रगाढ बन्दै गयो । निरन्तर फोन सम्पर्कमा रहेका यी दुईबीच भेट्ने कुरा चल्यो ।

त्यसपछि विर्तामोडमा भेट्ने भन्ने कुराको सल्लाह भयो । उहाँहरुबीच भेट भयो । दुवैजना एकअर्काबीच छुट्नै नसक्ने हुनुभयो । त्यसपछि उहाँहरुले प्रेम विवाह गर्नुभयो । होमबहादुर बयलकोटीले भन्नुभयो, “दुःख गरेर भएपनि सम्झनासँग खुसी छु ।” उहाँहरु दुवै गलत नम्बरकै कारण आफ्नो प्रेम सफल बनेकोमा खुशी छन् । रासस