सोलुखुम्बुमा आठ स्थानीय तह हुने

0 2

solukhumbu-city

सोलुखुम्बु, २३ कात्तिक । लामो समयको छलफलपछि सोलुखुम्बु जिल्लालाई आठवटा स्थानीय तह बनाउने सहमति भएको छ ।

सर्वदलीय बैठकको लामो प्रयासपछि साविकको एक नगरपालिका र ३० वटा गाविसलाई एक नगरपालिका र सात वटा गाउँपालिका बनाउने सहमति भएको स्थानीय तह पुनःसंरचना तथा प्राविधिक सहयोग समितिका संयोजक तथा स्थानीय विकास अधिकारी कृष्णप्रसाद सापकोटाले जानकारी दिनुभयो ।

निर्धारित संरचना अनुसार गोली, चौलाखर्क र भकान्जेको चौलाखर्क केन्द्र रहने गरी लिखु गाउँपालिका, गोराखानी, टाप्टिङ, केरुङ र दूधकुण्ड नगरपालिका साविककै सल्लेरी केन्द्र रहने गरी सोलुदूधकुण्ड नगरपालिका, यस्तै नेले, मुक्ली, देउसा, जुबु, लोखिम, कागेल र पञ्चनलाई मुक्ली केन्द्र रहने गरी थुलुङ दूधकोसी गाउँपालिका र सल्यान, नेचा बतासे, नेचाबेतघारी र तिङलालाई सल्यान केन्द्र रहने गरी नेचा सल्यान गाउँपालिका बनाउने सहमति भएको छ ।

यस्तै, बासा, वाकु, काकु र टाक्सीन्दुको बासाखालीमा केन्द्र रहने गरी बासाखाली गाउँपालिका, बुङ, छेस्काम र गुदेलको बुङमा केन्द्र रहने गरी महाकुलुङ गाउँपालिका, सोताङ र पावै सोताङ बजार केन्द्र रहने गरी सोताङ गाउँपालिका र चौरीखर्क, जुभिङ, नाम्चे र खुम्जुङलाई चौरीखर्कमा केन्द्र रहने गरी खुम्बु गाउँपालिका बनाउने सहमति भएको स्थानीय तह पुनःसंरचना तथा प्राविधिक सहयोग समिति सोलुखुम्बुले जनाएको छ ।

सबै आठ स्थानीय निकायमा गरी ३५ वटा वडा रहने पनि तय भएको छ । समितिले सो खाका सोमबार नै राज्य पुनःसंरचना आयोगमा पठाइसकेको छ । रासस

You might also like More from author