रित्तो सेफका लागि ‘इन्काउन्टर’

0 6

काठमाडौं,भदौ २४ । चन्द्रागिरीको घना जंगलसँगैको कच्ची बाटो त्यत्ति चल्ती नभए पनि काठमाडौंबाट मकवानपुर जाने नाका भएकाले प्रहरीको २४ घन्टे ड्युटी हुन्थ्यो ।
महानगरीय प्रहरी प्रभाग मातातीर्थका असई देउबहादुर चन्द ड्युटीको रोलक्रम अनुसार बिहान २ वजे उठेर सहयोगी हवल्दार नवराज खड्का लिएर ड्युटीमा खटिए ।
उनी १३ दिन अगाडी मात्रै मातातीर्थ पुगेका थिए । प्राय सुनसान हुने भएकाले यी दुवै गफ गर्दै मातातीर्थबाट बाउँथली चोकमा पुगे र त्यहीं बसे । बिहान ५ बजेसँगै झिसमिसे उज्यालो सुरु भयो । उनीहरु चोकमै रहेको बेला काठमाडौंतिरबाट ना.१ ज ३९४८ नम्बरको खरानी रंगको टाटा सुमो हुत्तिदै उकालोतिर आयो ।
‘कच्ची सडक भएकाले फाट्टफुट्ट मोटरसाइकल र मिनीट्रक चलेपनि सुमो चल्दैनथ्यो,’ चन्दले भने ‘बिहानै हुत्तिदै आएकाले शंका लाग्यो ।’
चन्द र खडाले सुमो रोक्न हात दिए तर रोकिएन । किचौलाझै गरी हुत्तिदै उकालोतिर हुइँकिएपछि चन्दले मोटरसाइकल स्टार्ट गर्न लगाएर गाडीको पिछा गरे । यो खबर आजको कान्तिपुरमा केपी ढुंगानाले लेखेका छन्।
गाडीको गती उच्च थियो । कच्ची बाटो र उकाले भएकाले उनीहरुको मोटरसाइकले सुमो भेट्न सकेन । दुवै सशस्त्र प्रहरीको क्याम्प नजिकै पुगे तर सुमो देखिएन । बाटो फरक पर्‍यो भन्दै फर्किएर सशस्त्रको निर्माणाधीन तालिम केन्द्र नजिक आइपुग्दा त्यहाँ सुमो रोकिइरहेको थियो ।
‘चालकको ढोका खुल्ला थियो, एक जना बाहिर उभिएर फोनमा कुरा गरिरहेका थिए,’ चन्दले भने ‘सुमोभित्र ३ जना थिए ।’
चन्दले सोधपुछ सुरु गरे ।
कहाँ जान लागेको ?
सुमोभित्र भएका एक जनाले भने ‘मकवानपुरमा बहिनी बिरामी भएकाले लिन जान लागेको उकालो चढ्न सकिएन ।’
बाहिर रहेका चालक मोवाइलमा कसैलाई निर्देशन दिंदै थिए ‘केटाहरु चाँडो ल्याओ ।’
दुवै प्रहरी अझै नजिक गए । हल्वदार गाडीको दायाँ हुँदै अगाडी बढे, चन्द सुमोको बायाँतिर थिए । गाडीको नजिक पुगे लगत्तै हवल्दार खड्का चिच्याए, ‘साप, बन्दुक ।’
लगत्तै सुमोमा रहेकाहरुले २ राउण्ड गोली प्रहार गरे । सुमोमा भएकाहरुलाई ताक्दै चन्दले पनि २ राउन्ड गोली चलाए । चारै जना सुमो छाडेर जंगलतिर भागे । गोली कसैलाई लागेन ।
‘खड्का साप केही अगाडि बढेलगत्तै सुमोभित्र भएकाहरु बाहिर निस्किएर ताक्दै गोली चलाएछन्, धन्न उनी कमान्डो तालिमप्राप्त भएकाले गाडीको अगाडिको भागको कभर लिएर जोगिए,’ बिहीबार बिहानको घटना सम्झदैं उनले भने, ‘म केही पछाडी भएकाले गाडिकै आड लिएर गोली हानें, तर अध्याँरो भएकाले जोगिए ।’
गोली चलेलगत्तै चन्दले महानगरिय प्रहरीको कन्ट्रोल रुम १००, महानगरिय प्रहरी वृत्त थानकोट र महानगरिय प्रहरी परिसर काठमाडौंमा खबर गरे । उनी कार्यरत प्रभागबाट १० मिनेटमै थप ६ जनाको मद्दती टोली पुगेपछि सुमोभित्र हेर्दा पछाडिको सिटको बीचमा फलामे सेफ देखियो । करिव १५ मिनेटमा थानकोट र काठमाडौं दवैतिरको थप टोली घटनास्थलमा पुगे र सुमोसहितको सेफ बोकेर फर्किए ।
‘तस्करीको सामान लिएर मकवानपुरहुँदै मधेस हिडेका हुन् भन्ने लागेको थियो तर चोर रहेछन्’, चन्दले भने ।
काठमाडौं परिसरमा सेफ ल्याएपछि प्रहरीले गाडीको नम्बरको आधारमा सवारी धनी र चालकसँगै सेफबारे खोजबिन गर्दा ललितपुरको चापागाउँमा रहेको सन्तानेश्वर बचत तथा सहकारी संस्थामा चोरी भएको खुल्यो । तत्काल सहकारीका अधिकारी टेकुस्थित परिसरको कार्यालय आएर सेफ हेरेर सनाखत गरे ।
रित्तो सेफका लागि ज्यानको बाजी
सहकारीको टन्न पैसा भएको आशंकामा बढो सकसका साथ फलामे सेफ चोरी गरे पनि आखिर त्यो पैसा बिहिन निस्कियो । उनीहरुको योजना अनुसार सेफ मकवानपुरमै पुगे पनि उनीहरुको हातमा सहकारीको कागजमात्रै फेला पर्ने रहेछ ।
काठमाडौं परिसरका एसपी प्रधुम्न कार्कीका अनुसार सहकारीको ग्रीलको ताल्चा काटेर बेलुका चोरी भएको खुलेको छ । स्थानीयबासीले बेलुका १२ बजेतिर गाडीको आवाज सुनेकाले सोही समयमा चोरी भएको प्रहरीको अनुमान छ ।
टन्न पैसा भएको आशंकामा सहकारीको फलामे सेफै बोकेर हिडे पनि सहकारीका अधिकारीले प्रहरीलाई दिएको जानकारी अनुसार त्यसमा पैसा थिएन, सहकारीको महत्वपूर्ण कागजपत्र मात्रै थियो ।
यस भन्दा अगाडि पनि सहकारीमा चोरीको प्रयास भएकाले उनीहरुले सेफमा पैसा राख्न छाडेका थिए । चोरी ललितपुर क्षेत्रमा भएकाले काठमाडौं प्रहरीले सेफ ललितपुर प्रहरीलाई बुझाएको छ ।

You might also like More from author