उपराष्ट्रपतिको डरले राष्ट्रपतिको भारत भ्रमण स्थगित !

0 28

Vice-President Nanda Bahadur Pun assumes his office after being sworn-in by President Bidya Devi Bhandari, in Kathmandu, on Sunday, November 1, 2015. Photo: RSS

 

काठमाडौं,जेठ २१ । अन्तिम समयमा आएर राष्ट्रपति विद्या भण्डारीको भारत भ्रमण स्थगित भएको विषयमा नयाँ खुलासा भएको छ । सरकार निकट उच्च कुटनीतिक स्रोतले भ्रमण स्थगनमा भारत र नेपालको आन्तरिक राजनीतिलाई नै जिम्मेवार ठानेको छ । गत वैशाख २७ बाट राष्ट्रपति भण्डारीले भारत भ्रमण गर्ने तय भएको थियो । तर, अन्तिम समयमा आएर सरकारले बैखाख २४ मा उनको भ्रमणलाई अनुमोदन गरेन । त्यसपछि भ्रमण स्वत स्थगन भयो । उपराष्ट्रपति नन्दबहादुर पुन पासाङले चाल्न सक्ने कदमप्रति चासो राख्दै राष्ट्रपतिको भ्रमण स्थगित गरिएको स्रोतहरुको भनाई छ ।

पहिलो कारण

राष्ट्रपति भण्डारीको भारत भ्रमणका बेला भारतीय प्रधानमन्त्री नरेन्द्र मोदीसँगको भेट तालिका बनेको थियो । भारतीयपक्षबाट बनाइएको तालिकामा भेट मोदी कार्यकक्षमा हुने गरि तयार भएको स्रोतले बतायो । शिष्टचारमा राष्ट्रपति बसेकै ठाँउमा भारतीय प्रधानमन्त्री मोदीले भेट गर्नुपर्ने हुन्थ्यो । तर, भारतीय अधिकारीहरुले भेटका लागि मोदीको कार्यकक्ष तय गरे । यसलाई कुटनीतिक मामलाका जानकारहरुले भारतले नै राष्ट्रपतिको भ्रमण नचाहको रुपमा ब्याख्या गरेका थिए । यतिबेलासम्म पनि प्रधानमन्त्री ओली राष्ट्रपतिलाई भारत पठाएर सम्बन्ध सुधारको सम्भावना खोजी गरिरहेका थिए ।

तर, दोस्रो कारण जसले भ्रमण रोक्यो
जतिबेला राष्ट्रपति विद्या भण्डारीको भारत भ्रमणको तयारी हुँदै थियो, ठीक त्यहीबेला नेपालमा सत्ता परिवर्तनको कसरत भैरहेको थियो । माओवादीले एमालेसँगको सहकार्य तोडेर आफ्नै नेतत्वमा राष्ट्रिय सहमतिको सरकारका लागि गृहकार्य गरेको थियो । यस्तो बेला राष्ट्रपतिको भूमिका बढन सक्ने विषयमा एमाले निकट वकिलहरुले प्रधानमन्त्री केपी शर्मा ओलीलाई विफ्रिङ गरेका थिए ।

राष्ट्रपति विदेश भ्रमणमा गएका बेला स्वत उपराष्ट्रपति कार्यबाहक हुने संवैधानिक व्यवस्था छ । स्रोतका अनुसार ती कानुन व्यवसायीले यस्तो अबस्थामा माओवादी सरकारबाट बाहिर आउने र उपराष्ट्रपति नन्दबहादुर पुन पासाङले राष्ट्रिय सरकारका लागि आव्हान गर्न सक्ने सम्भावना देखेका थिए । तर, पछि एमाले र माओवादीवीच ९ बुँदे सहमति बन्यो र सरकार बच्यो । अहिले सत्ता साझेदार दलवीच भद्र सहमति अनुसार सरकारको नेतृत्व फेर्ने विषयमा मतभेद शुरु भएको छ ।

राष्ट्रपति भण्डारीको भारत भ्रमण स्थगित हुनुमा प्रधानमन्त्री केपी शर्मा ओलीको भारतसँगको असन्तुष्टिका रुपमा यसलाई ब्याख्या गरियो । आफ्नो सरकार परिवर्तनमा भारतले भूमिका खेलेको निश्कर्षसहित प्रधानमन्त्री ओलीले राष्ट्रपतिको भ्रमण रोकेको रुपमा पनि ब्याख्या गरिएको थियो ।

सोही बेला सरकारले भारतस्थित नेपाली राजदूत दीपकुमार उपाध्यायलाई पनि फिर्ता बोलाउने निर्णय गरेको थियो । मन्त्रीपरिषद्बाटै राष्ट्रपतिको भ्रमण अनुमोदन भएन । प्रधानमन्त्री कार्यालयका अधिकारीहरुले औपचारिक भ्रमणको तयारी नपुगेको भन्दै भ्रमण स्थगन भएको बताएका थिए । आजको जनआह्वान साप्ताहिकमा खबर छ– राष्ट्रपतिको भ्रमणका लागि भारतीय राष्ट्रपति प्रवण मुखर्जीको निम्तो आएको थियो ।