प्रचण्डका ज्वाईं किर्ते काण्डमा तानिए

0 10

काठमाडौं,जेठ ११ । नेकपा माओवादी केन्द्रका अध्यक्ष प्रचण्डका ज्वाईं अर्जुन पाठक किर्ते काण्डमा तानिएका छन् । ठगी तथा लुटपाट जस्ता अपराधमा संलग्न एक व्यक्तिलाई सिंहदरबार प्रवेशको नक्कली कार्ड बनाएको आरोपमा प्रहरीले उनीमाथि छानबिन अघि बढाईरहेका छन् । पाठक आपूर्तिमन्त्री गणेशमान पुका स्वकीय सचिव हुन् । पाठकले किर्ते मुद्दामा पक्राउ परेका नरेन्द्र पण्डितलाई सिंहदरबार प्रवेशका लागि नक्कली कार्ड बनाईदिएका थिए । महानगरिय प्रहरी वृत्त कमलपोखरीले पण्डितलाई गत चैत्र १ गते बागबजारबाट पक्राउ गरेको थियो । पण्डितको साथबाट नक्कली लाइसेन्स र सिंहदरबार प्रवेशका लागि जारी गरिएको परिचयपत्र भेटिएको थियो । अनुसन्धानका क्रममा दुबै नक्कली भएको खुलेपछि उनीविरुद्ध प्रहरीले किर्ते मुद्दा चलाएको छ ।

बयानको क्रममा पण्डितले सिंहदरबार प्रवेशको परिचयपत्र मन्त्री पुनका पीए भण्डारीले बनाइदिएको भन्दै सक्कली नै भएको दाबी गरेका थिए । खानेपानी तथा सरसफाई मन्त्रालयबाट सुलभ पण्डित क्षेत्रीको नाममा कार्ड जारी भएको थियो । तर, प्रहरीले अनुसन्धान गर्दा परिचयपत्र नक्कली भएको खुलेको हो ।

पण्डितले यस अघि पनि विभिन्न ठगीका कामहरु गरिसकेका छन् । पण्डितले विभिन्न व्यक्तिलाई अमेरिका पठाईदिने भन्दै लाखौं रुपैयाँ ठगी गरेका थिए । उनीबाट पीडित व्यक्तिहरु कमलपोखरी प्रहरी वृत्तमा पुगि उनी विरुद्ध उजुरी दिएपछि प्रहरीले उनलाई बागबजारबाट पक्राउ गरेको हो । हाल पण्डितलाई छुटाउन कांगेस सभापति शेरबहादुर देउवाका सहयोगीहरुले समेत प्रहरीलाई दवाव दिएको स्रोतको दाबी छ आजको दृष्टि साप्ताहिकमा खबर छ ।