समाज कल्याण परिषदमा जागिर खुल्यो, ४२ जना कर्मचारी माग

0 8

काठमाडौं,वैशाख १६ । समाजकल्याण परिषदले बिभिन्न पदमा ४२ जना कर्मचारी माग गरेको छ । बिहीबार गोरखापत्रमा सार्वजानिक सूचना प्रकाशित गरी परिषदले प्रशासन, कानुन र लेखा समूहमा खरिदारदेखि शाखा अधिकृत सरहका कर्मचारी माग गरेको हो । परिषदले शाखा अधिकृत सरहका ११ जना सहायक निर्देशक, १ जना कानुन अधिकृत, नायब सब्बा सरहकासहायक प्रथम र लेखापालमा ४/४ र १ जना टेलिफोन अपरेटर माग गरेको छ । यस्तै खरिदार सरहका १६ जना सहायक द्वितीय, ३ जना सहलेखापाल, प्लम्बर र टेलिफोन अपरेटर १/१ माग गरेको छ ।

सहायक निर्देशकका लागि स्नातक उतीर्ण भएको हुनुपर्नेछ । भने कानुन अधिकृतका लागि कानुनमा स्नातक, सहायक प्रथम र लेखापालका लागि प्लस टु सरह उतीर्ण र सहायक द्वितीयका लागि एसएलसी उत्तीर्ण गरेको हुनुपर्ने विज्ञापनमा उल्लेख छ । दुईजना टेलिफोन अपरेटरमध्ये सहायक प्रथमको लागि प्लस टु उतीर्ण र सहायक द्धितियको लागि एसएलसी उतीर्ण गरेको हुनुपर्ने छ । त्यस्तै प्लम्बरका लागि प्राविधिक एसएलसी पास गरेको वा सिटिइभिटीबाट तह २ को सीप परीक्षण परीक्षा उतीर्ण भएको हुनुपर्नेछ ।

योग्यता पुगेका नेपाली नागरिकले जेठको १६ गतेसम्म दरखास्त दिनुपर्नेछ । अन्तिम दिनको भोलिपल्टदेखि ७ दिनसम्म दोब्बर दस्तुर तिरी दरखास्त बुझाउन सकिनेछ । दरखास्त शुल्क अधिकृत तहको १ हजार, नायब सुब्बा तहकोलाई ४ सय र खरिदार सरहकोलाई ३ सय रुपैयाँ तोकिएको छ ।
-आर्थिक न्युज