विदेशमा बिक्दैछ, सेना-प्रहरीको प्रमाणपत्र

0 6

nepali-sena1_20130715064935

काठमाडौं,चैत ९ । नेपालका सुरक्षाकर्मीले युद्ध लड्नु पर्दैन । माओवादी युद्ध अन्त्यपछि उनीहरुलाई मुलुकभित्र देखिने गरी खतरा छैन । यसको मतलब युवाका लागि सुरक्षा अंग रोजगारीको आकर्षक गन्तव्य बन्नुपर्ने हो । तर, सेना, सशस्त्र प्रहरी र नेपाल प्रहरीका तल्लो तहमा कार्यरत युवाले स्थायी जागिर र पेन्सन सुविधालाई वेवास्ता गर्दै जागिर छाड्ने क्रम जारी छ । आजको नागरिक दैनिकमा समाचार छ ।

सशस्त्र प्रहरीका जवान पदमा आठ वर्ष काम गरेपछि दीपक गिरीले २०७१ पुसमा राजीनामा दिए । थप आठ वर्ष काम गरेको भए उनको पेन्सन पाइन्थ्यो  । जीवनभर पेन्सन खान पाउँथे । तर परिवार चलाउन गाह्रो भएपछि उनले राजीनामा दिए ।

पर्वत कुश्माका स्थायी बासिन्दा गिरीले सुरक्षा अंगमा कार्यरत रहँदा हतियार चलाउने डि्रल, बिल्ला वार, म्यापरिडिङलगायत तालिम लिएका छन् । राज्यले पैसा खर्चेर उनलाई तालिम दिएको छ ।

नेपाली सेनाले नौ महिने तालिम पूरा गरी एक सैनिक जवान तयार पार्न करिब सात लाख ७० हजार रुपैयाँ र सैनिक अधिकृतको २४ महिने तालिम पूरा गर्न प्रतिव्यक्ति करिब २८ लाख रुपैयाँ लगानी गर्ने गरेको नेपाली सेनाका प्रवक्ता ताराबहादुर कार्कीले बताए । अन्य विभागले पनि यही हाराहारीमा तालिममा लगानी गर्दछन् ।

राज्यले लगानी गरेर दिएको त्यही सीपको प्रमाणपत्रसहित वैदेशिक रोजगारीमा जाने तयारीमा दीपक जस्ता अरु धेरै युवा छन् । सुरक्षा निकायको रोजगारी यसरी बीचमा छाडेर विदेश जाने तयारी गर्ने दीपक प्रतिनिधि उदाहारण मात्रै हुन् ।