भारतीय नेताद्वारा नेपालमाथिको ‘अघोषित नाकाबन्दी’को विरोध

0 5

काठमाडौं, फागुन २० । नेपाली कांग्रेसको विहीबारबाट सुरु भएको १३औं महाधिवेशनमा विभिन्न देशका विभिन्न पार्टीबाट आएका प्रतिनिधिले महाधिवेशनको सफलताको शुभकामना व्यक्त गरेका छन् । महाधिवेशनको सफलताको शुभकामना दिन आएका भारतीय नेताले भारतले केही समयअघि नेपालमाथि गरेको अघोषित नकाबन्दीको विरोध गरेका छन् ।

भारतीय कम्युनिस्ट पार्टी (माक्र्सवादी)का नेता जोगेन्द्र शर्माले भारतले गरेको आर्थिक नाकाबन्दीको कारण नेपाली जनता कठिनाइ र यातानाबाट गुज्रिनुपरेको दुखेसो पोखे । उनले भारतले नेपालमा धार्मिक अतिवाद लाद्न खोजेको आरोप लगाउँदै नाकाबन्दीका कारण नेपालीले भोग्नुपरेको दुःखमा भारतीय जनता साथमा रहेको टिप्पणी गरे ।

लोकतान्त्रिक समाजवादी पार्टीका उपाध्यक्ष विजयप्रतापले ‘भारतले केही समयअघि नेपालमा गरेको नाकाबन्दीका लागि आफू दुखित भएको’ बताउँदै ‘नेपाली जनतासँग क्षमा माग्छु’–भने । उनले भारतमा समाजवादी आन्दोलनलाई बलियो बनाउन नसकेकै कारण नेपालले भारतीय थिचोमिचो सहनुपरेको धारणा राखे ।

भारतीय कम्युनिस्ट पार्टीका नेता पल्लभसिंह गुप्ताले नेपालको नयाँ संविधान प्रगतिशील भएको भन्दै त्यसको स्वागत गरे ।