नेपाल क्वाटर फाइनलमा,योगेन्द्रको अर्धसतक सन्दीपको ह्याट्रिक

0 8

nepal-vs-ireland-8

काठमाडौं,माघ १६ । नेपालले एसिसी अण्डर १९ विश्वकप क्रिकेटको दोस्रो खेलमा आयरल्याण्डमाथि किर्तिमानी जित निकाल्दै  क्वाटर फाइनलमा पुगेको छ । जारी विश्वकपको पहिलो खेलमा न्युजिल्याण्ड र दोश्रो खेलमा शनिबार आयरल्याण्डलाई हराएर ४ अंक बटुलेको नेपाल शनिबार नै भएको अर्को खेलमा भारतले न्युजिल्याण्डलाई १ सय २० रनले हराएपछि एक खेलअघि नै क्वाटर फाइनलमा पुगेको हो ।  नेपालले दोस्रो खेलमा आयरल्याण्डलाई ८ विकेटले पराजित गरेको छ ।

५० ओभर पुरै खेल्दै १ सय ३१ रनमा समेटिएको आयरल्याण्डले खेलको सुरुवातीमै नेपाललाई झड्का दिएपनि त्यसपछि खासै नेपाली टोलिलाई दबावमा राख्न सकेन । नेपालको जितका लागि योगेन्द्र सिंह कार्कीले अर्धसतक पुरा गरे । कार्कीले  ७९ बलमा ८ चौका प्रहार गर्दै ६१ रन जोड्न सफल भए । त्यस्तै, नेपालका लागि आरिफ सेखले ३१ रन जोडे । आरिफले ३६ बलमा ५ चौका प्रहार गरे ।

टस जिटेर व्याटिङ गरेको आयरल्याण्डले नेपालसामु १३२ रनको सामान्य स्कोरको चुनौती पेस गरेको  थियो । बङ्गलादेशस्थित फतुल्लाह रङ्गशालामा टस जितेर ब्याटिङ गरेको आयरल्यान्डले पुरै ओभर खेल्दै ९ विकेटको क्षतिमा १३१ रन मात्र बनाउन सक्यो । आयरल्यान्डका सस्तैमा समेट्न नेपालका लागि सन्दीप लामिछानेले ह्याट्रिकसहित ५ विकेट लिए । त्यस्तै, दीपेन्द्र ऐरीले २ तथा सुनिल धमला र सुशील कँडेलले १÷१ विकेट झारे । नेपाल १९ वर्षमुनिको विश्वकप क्रिकेटको समूह चरण पार गरेको यो दोश्रो पटक हो । यसअघि सन् २००० मा पहिलो पल्ट विश्वकप खेलेको बेलामा पनि नेपाल सुपर लिगमा पुगेको थियो ।

यो समूहमा आफ्ना दुवै खेल हारेका आयरल्याण्ड र न्युजिल्याण्ड प्रतियोगिताबाट बाहिरिएका छन् । यद्यपी यी दुई बीच सोमबार समूह चरणको अन्तिम खेल हुने छ ।

अष्ट्रेलियाले सुरक्षाको कारण देखाउँदै बंगलादेश जान अस्वीकार गरेपछि आइसिसीले उसको सट्टा आयरल्याण्डलाई यो प्रतियोगितामा मौका दिएको थियो ।  अब नेपालले अर्को खेलमा आगामी सोमबार भारतको सामना गर्नेछ ।