नयाँ शक्तिको बहसमा भाग लिन पाऔँ– एमाओवादी केस, पार्टी छाडेका होइनौँ – पौडेल

0 3

काठमाडौँ, १७ कात्तिक । एकीकृत नेकपा(माओवादी)का ४० केन्द्रीय नेताले नयाँ शक्ति निर्माणसम्बन्धी बहसमा भाग लिनका लागि पार्टी केन्द्रीय कार्यालयमा निवेदन दर्ता गराएका छन् ।

एमाओवादीका नेता देवेन्द्र पौडेलको नेतृत्वमा गएका नेताहरुले पार्टी कार्यालयका मुख्यसचिव हितराज पाण्डेमार्फत अध्यक्ष पुष्पकमल दाहाललाई सो निवेदन दर्ता गराएका हुन् । तराई मधेसको समस्या समाधान नगरी संविधान जारी गरिएको र विगतदेखि नै पार्टीभित्र आफूहरुले उठाएको विषयलाई पार्टी नेतृत्वले ध्यान नदिएको भन्दै नयाँ शक्ति निर्माणको बहसमा सामेल भएको नेता पौडेलले जानकारी दिनुभयो ।

आफूहरुले तत्काल पार्टी भने नछाडेको जानकारी दिँदै उहाँले बहसमा भाग लिन पाऔँ भनेर मात्र निवेदन दर्ता गराएको राससलाई जानकारी दिनुभयो ।

राजीनामा नै हो– यादव
नेता रामरिझन यादवले भने आफूहरुले एमाओवादी परित्याग गरेको जानकारी दिनुभयो । उहाँले एमाओवादीको केन्द्रीय समितिमा रहेका ४५ जनाले सामूहिक रुपमा राजीनामा दिएको र आजदेखि एमाओवादीमा नरहेको बताउनुभयो । नयाँ संविधान जारी भएलगत्तै एमाओवादीका वरिष्ठ नेता डा बाबुराम भट्टराईले नयाँ शक्ति निर्माणमा लाग्ने बताउँदै पार्टी परित्याग गर्नुभएको थियो । आज निवदेन बुझाउने नेताहरुले पनि उहाँले निर्माण गर्ने नयाँ शक्तिमा सामेल हुने बताउँदै आउनुभएको छ ।

‘‘एमाओवादीको साधारण सदस्य समेत परित्याग गरेका छौँ, पार्टीले तराई मधेसका विषयमा प्रस्ट अवधारणा ल्याउन सकेन, सबै पक्षको सहमतिमा राष्ट्रिय सहमतिको सरकार गठन गर्नुपर्नेमा पार्टी नेतृत्व नेकपा(एमाले)सँग लहसियो”– यादवले भन्न्ुभयो ।

एमाओवादी परित्याग गरेको बताउनेमा हिसिला यमी, रामचन्द्र झा, रामकुमार शर्मा खिमलाल देवकोटा, देवेन्द्र पराजुली, कल्पना धमला, कुमार पौडेल, गङ्गानारायण श्रेष्ठ, राजेन्द्र किरातीलगायत ४५ जना हुनुहुन्छ । तर नेता प्रभु साहले भने आफू सो समूहमा नरहेको बताउनुभएको छ । पार्टी परित्याग गरेको बताउनेमा सांसद भने कोही पनि छैनन् ।

एमाओवादी केन्द्रीय कार्यालयका मुख्य सचिव पाण्डेले भने बहसमा भाग लिन पाऔँँ भन्दै अध्यक्षलाई सम्बोधन गरेर निवेदन दर्ता गराइएको जानकारी दिनुभयो ।

मुलुक भारतको अघोषित नाकाबन्दीका कारण समस्यामा परेको बेला पार्टीलाई एकीकृत बनाएर अगाडि जानुपर्नेमा डा बाबुराम भट्टराई पक्षीय नेता भन्दै निवेदन दर्ता गराउनु र बहसमा भाग लिन पाऔँ भन्नु गलत भएको उहाँले बताउनुभयो ।

निवेदनमा उल्लेख गरिएको विषयमा बारेमा भने आफूले अध्ययन गर्न नपाएको उहाँले राससलाई जानकारी दिनुभयो ।