मलेसियामा शक्तिशाली भूकम्पको धक्का (भिडियो)

0 4
नेपाली श्रमिकहरु सुरक्षित
काठमाडौं : लाखौं नेपालीले रोजगारी गरिरहेको मलेसियामा शुक्रबार बिहानै शक्तिशाली भूकम्पको धक्का महसुस भएको छ  ।

मलेसियाको सबाह राज्यको बोर्नियो समुद्री तट नजिकैको माउन्ट किनाबालुलाई केन्द्रबिन्दु बनाएर ६ म्याग्निच्यूटको भूकम्पको धक्का महसुस भएको द मलाया अनलाइनले जनाएको छ ।

भूकम्पले मलेसियाका सडक र भौतिक संरचनामा क्षति पुगेको छ । भूकम्पले सडकहरु चिराचिरा परेका छन् । तर, भूकम्पबाट भएको मानवीय क्षतिबारे अहिलेसम्म खबर प्राप्त भएको छैन ।

भूकम्पपछि माउन्ट किनाबालु क्षेत्रमा मानिसहरु फसेको तथा घाइते भएको आशंकामा उद्धार र खोजी कार्यलाई तीब्र पारिएको छ ।

अमेरिकन भूगर्भ विभागको सर्भे अनुसार पृथ्वीको १० किलोमिटर तल गएको भूकम्पले मलेसियाको अधिकांश भाग हल्लाएको हो । भूकम्पको केन्द्रबिन्दु मलेसियन राज्य सबाहको राजधानी कोटा किनाबालुबाट ५४ किलोमिटर पुर्वमा रहेको छ ।

सबाह राज्यका पर्यटन तथा वातावरण मन्त्री  मसिदी मनजुनले ४ हजार ९५ मिटर अग्लो कोटा किनाबालु पहाडमा रहेका केही पुरातात्विक महत्वका पूर्वाधारमा क्षति पुगेको बताएका छन् ।
भूकम्पपछि कोटा किनाबालु पहाडमा उद्धार जारी रहेको जनाउँदै त्यहाँकै आकर्षण केन्द्र ‘गधाको कान’ आकारको चट्टानलाई भूकम्पले क्षति पुगेको बताइएको छ । भूकम्पले कोटा किनाबालु चढ्न गएका आरोहीहरु घाइते भएपछि उद्धार थालिएको छ ।

नेपाली श्रमिकहरु सुरक्षित
यो राज्यमा नेपाली श्रमिकहरु थोरैमात्र कार्यरत छन् । मलेसियास्थित अन्नपूर्णकर्मी अर्जुन काफ्लेका अनुसार भूकम्पमा नेपाली नागरिक परेको समाचार अहिलेसम्म प्राप्त भएको छैन ।

यो राज्यको जंगलक्षेत्रमा करिब २ सयजना नेपाली कार्यरत रहेको बताइएको छ । उनीहरु जंगलक्षेत्रमा मजदुरी र सुरक्षागार्डका रुपमा कार्यरत रहेका छन् ।

भूकम्पमा उनीहरु हताहत भएको खबर नरहेको मलेसियास्थित अन्नपूर्णकर्मी अर्जुन काफ्लेले जनाएका छन् ।