अन्तिम खेलमा रोनाल्डोको ह्याट्रिक

0 3
बार्सिलोना : उपाधि जित्न नसके पनि स्पेनिस ला लिगाको अन्तिम खेलमा रियल म्याड्रिडले गेटाफेलाई ७-३ गोलको फराकिलो अन्तरले हराएको छ।
अन्तिम खेलमा ह्याट्रिक गर्दै रियलका पोर्चुगिज स्टार क्रिस्टियानो रोनाल्डो भने जारी सिजनका सर्वाधिक गोलकर्ता बनेका छन्। उनले जारी सिजनमा गरेको यो आठौं ह्याट्रिक हो।
रोनाल्डोको यो सिजनमा गरेको गोल संख्या ६१ पुगेको छ। उनले कुनै पनि सिजनमा गरेको यो सर्वाधिक गोल हो। यसअघि उनले सन् २०११/१२ सिजनमा ६० गोल गरेका थिए।
उनले ला लिगामा मात्र यो सिजन ४८ गोल गरे। रियलको चिरप्रतिद्वन्द्वी बार्सिलोनाका अर्जेन्टिनी खेलाडी लियोनल मेसीले जारी सिजनको लिगमा गरेको भन्दा ३० वर्षीय रोनाल्डोले पाँच गोल बढी गरे।
रोनाल्डोको ह्याट्रिकको मद्दतले नै रियलले पहिलो हाफमा गेटाफेलाई ३-३ को बराबरीमा रोकेको थियो। उनले निर्धारित समयको १३ औं, ३२औं र ३४औं मिनेटमा गोल गरे।
गेटाफेका लागि भने २३औं मिनेटमा सर्जियो स्कुडेरो, २६औं मिनेटमा डिएगो क्यास्ट्रो र ४२औं मिनेटमा मेहदी लासेनले एकएक गोल गरेका थिए।
खेलको दोस्रो हाफमा रियलले चार गोल थप्यो। ४७औं मिनेटमा जोभियर हर्नान्डेजले रियलको अग्रतलाई ४-३ बनाए भने ५१औं मिनेटमा जेम्स रोड्रिगुएजले टोलीका लागि पाँचौं गोल गरे।
यसैगरी ७१ औं मिनेटमा जेसी रोड्रिगुएजले छैटौं र निर्धारित समयको अन्तिम मिनेटमा मार्सेलोले सातौं गोल गरे। खेलका क्रममा रोनाल्डो स्थानमा मार्टिन ओडेगार्ड परिवर्तित खेलाडीका रुपमा मैदान प्रवेश गरेका थिए।
१६ वर्षीय मार्टिन ला लिगा खेल्ने रियलका सबैभन्दा कम उमेरका खेलाडी पनि बने। उनी गत जनवरीमा रियलमा आबद्ध भएका थिए। ला लिगाको उपाधि भने बार्सिलोनाले यसअघि नै जितिसकेको छ। बार्सा आफ्नो अन्तिम खेलमा डेपोर्टिभो ला कोरुनासँग २-२ गोलको बराबरीमा रोकियो।
बार्साका लागि दुवै गोल मेसीले गरे। बार्साको घरेलु मैदानमा ला कोरुनाका लागि भने लुकास पेरेज र डिएगो सालोमाओले एकएक गोल गरे।
अन्तिम चरणको खेलको समाप्तिपछि उपाधि विजेता बार्साको अंक ९४ पुग्यो। दोस्रो भएको रियलले ९२ र तेस्रो स्थानमा आसिन साबिक विजेता एट्लेटिको याड्रिडले ७८ अंक हात पारे।
बार्सा, रियल र एट्लेटिको सीधै आगामी सिजनको च्याम्पियन्स लिगका लागि छनोट पनि भए। ७७ अंकसहित चौथो भएको यालेन्सियाले भने च्याम्पियन्स लिगका लागि प्लेअफ खेल्नुपर्ने भएको छ। यालेन्सियाले अन्तिम खेलमा अल्मेरियालाई ३-२ गोलले हरायो।
यसैगरी ७६ अंकसहित पाँचौं भएको सेभिल आगामी सिजनको युरोपा लिगका लागि छनोट भयो भने ६० अंकसहित छैटौं भएको भिल्लारियलले युरोपा लिगका लागि प्लेअफ खेल्नुपर्ने भयो।
अन्तिम खेलमा सेभिलले मालागालाई ३-२ गोलले हरायो। भिल्लारियल भने अन्तिम खेलमा एथलेटिक बिल्बाओसँग ४-० गोलले पराजित भयो। बिल्बाओ ५५ अंकसहित सातौं भयो।
ईबर, अल्मेरिया र कोर्डोबा भने ला लिगाबाट रेलिगेसनमा परे। ३५ अंकसहित ईबर १८ औं, ३२ अंकसहित अल्मेरिया १९ औं र २० अंकसहित कोर्डोबो अन्तिम स्थानमा रहे।
ईबरसँग समान अंक भए पनि गोल अन्तरका आधारमा ला कोरुना (१६औं) र ग्रानडा (१७औं) भने रेलिगेसनमा पर्नबाट जोगिए। आफ्नो अन्तिम खेलमा ग्रानडाले एट्लेटिकोलाई गोलरहित बराबरीमा रोक्यो।-एजेन्सी