काठमाडौंका बीस प्रतिशत घर बस्न अयोग्य

0 4
काठमाडौं : वैशाख १२ गतेको विनाशकारी भूकम्प र यसपछि आएका पटकपटकका धक्काले काठमाडौं उपत्यकाका २० प्रतिशत घर बस्न अयोग्य रहेको स्थलगत निरीक्षण अध्ययनबाट देखिएको छ।
विनाशकारी भूकम्पपछि नेपाल इन्जिनियर्स एसोसिएसनले सहरी विकास तथा भवन निर्माण विभागको समन्वयमा काठमाडौं उपत्यकाका तीस हजारभन्दा बढी घरधुरीमा गरेको अध्ययनबाट यस्तो निश्कर्ष निकालिइएको हो । एसोसिएसनले बिहीबार अध्ययनको प्रतिवेदन सार्वजनिक गरेको छ।
उपत्यकामा रहेका विभिन्न ३० हजार दुई सय २८ घरधुरीको अनुगमनबाट यस्तो तथ्य फेला परेको जानकारी एसोसिएसनका अध्यक्ष ई. ध्रुबराज थापाले बताए। एशोसिएसनले गरेको अनुगमनअनुसार ३० हजार घर र भवनमध्ये पूर्ण क्षति पुगेका २० प्रतिशत बस्न अयोग्य, आशिंक क्षति पुगेका २९ प्रतिशत आवश्यक मर्मतपछि सतर्कतापूर्वक बस्न मिल्ने र ५१ प्रतिशत घरमा केही नभएको अवस्था छ।
अध्यक्ष ई. थापाका अनुसार काठमाडौंमा १४ हजार एक सय ६६, भक्तपुरका सात हजार एक सय ५० र ललितपुका आठ हजार नौ सय १२ घरधुरीको अवस्था बारेमा स्थलगत अनुगमनबाट नै तथ्यांक संकलन गरिएको छ। उनका अनुसार एसोसिएशनले हालसम्म तीन हजार स्वयंसेवी र विज्ञ इन्जिनियरलाई घरहरुको निरीक्षण गर्न पठाएको थियो। एसोसिएसनले थप पाँच सय जनालाई एक साताको तालिम दिएर बजारमा खटाउने तयारी भएको छ।
एसोसिएसनले हरेक घर बनाउँदा भूकम्प प्रतिरोधात्मक घर बनाउनुपर्ने र भवन निर्माण आचार संहिता पालन गर्न आव्हान समेत गरेको छ। भूकम्प प्रभावित सबै जिल्लामा इन्जिनियर खटाइसकिएको पत्रकार सम्मेलनमा जानकारी दिइयो।