वालाजुमा ४८ घण्टापछि महिलाको जीवितै उद्धार

0 3

१४ वैशाख, काठमाडौं । बालाजुको माछापोखरीस्थित लुम्बिनी गेष्ट हाउसको ध्वस्त भवन भित्रबाट एक महिलाको जीवितै उद्धार गरिएको छ ।
विनाशकारी भूकम्पको पहिलो धक्कामै ढलेको लुम्बिनी गेष्ट हाउसको ध्वस्त संरचनाभित्र सशस्त्र प्रहरीले उद्दार गर्ने क्रममा पुरिएको ४८ घण्टापछि ती महिलाको जीवितै उद्धार गरिएको हो ।
घाइते अवस्थामा भेटिएकी महिलालाई उपचारका लागि बालाजुको जनमैत्री अस्पतालमा भर्ना गरिएको सशस्त्र प्रहरीले जनाएको छ । यसैबीच सशस्त्र प्रहरी महानिरीक्षक कोषराज वन्तले घाइतेलाई उद्धार गरेर राखिएका विभिन्न अस्पतालको निरीक्षण गरि उपचारमा कुनै कमी हुन नदिन आग्रह गरेका छन् ।
भूकम्पका कारण घर छाडेर विभिन्न स्थानमा बस्दै आएकाहरुमा सरुवा रोगहरुको खतरा बढेको छ ।
शनिबार विहान ११ बजेर ५६ मिनेटमा ७.८ रिक्टेर स्केलको भूकम्प गएको थियो । त्यसपछि पनि पटक पटक भूकम्पको धक्का महसुस भएपछि अधिकांश मानिस घर बाहिर बसेका छन् ।
घर आसपासका खाली ठाउँमा मानिसहरु त्रिपालमा बसेका छन् । टुँडिखेल, संविधानसभा भवन लगायत खुला ठाउँहरुमा पनि मानिसहरु पाल टाँगेर बसेका छन् ।